有家底？他在屋邨長大，半工讀到美國留學，在那邊做過中餐館送外賣，絕不是「成功需父幹」。
送飯盒啟發 GOGOVan 概念
自言一向喜歡做生意的Steven，細細個就幫人整電腦、整單車賺錢，近年又炒過iPhone。於2010年回港後，應徵過iBank等多份工作都沒回音，終於決定創業。
「第一盤生意做得好差，唔好提喇。」好，講第二盤生意，係跟兩個一齊在美國讀書、在餐館打工的同學夾份的飯盒廣告生意。「喺美國嗰陣已經諗到呢條橋，見啲飯盒白雪雪，不如唔好嘥，貼個廣告上去啦。」於是在香港正式實行這條橋，做了9個月便達到收支平衡，亦幫他想到用app call貨van這門生意。
「當時朝朝都要送啲貼好晒廣告嘅飯盒去唔同餐廳，但發覺call van原來好難，成日等成個幾兩個鐘都冇車。但係走落街又會見到啲van仔泊喺度冇嘢做，敲窗問佢哋送唔送貨，全部都話送，於是知道呢行存在問題。」
Steven認為問題就係不同司機隸屬不同無綫電電召call台，山頭太多，就好難找到適合的司機接order。而且司機又要畀最少過千元的月費給call台，所以不會同時加入多個台；還有大班每日只打算做幾個鐘生意的「散戶」司機，無打算付月費上台，根本沒有渠道向他們落order。
所以，Steven便深信call van app有得做，跟手結束了覺得發展空間不大的飯盒廣告生意，與原來兩名partner，以及後來加入的另外兩位朋友，合共5人創辦 GOGOVan 。
面對香港後來者的競爭，Steven會以提升app的效能去保持競爭力，例如加快發送order的速度、增加同一時間處理order的數量（現為每分鐘數千）、改善司機定位的準繩度等。至於app將會加入甚麼新功能，他不肯透露，因為怕一說出來就會被抄襲。
100呎劏房變5,000呎寫字樓
GOGOVan 於2013年7月正式成立，係當時全港第一個call van app。雖然創業成本只係5個人籌期籌回來的2萬元，辦公室係一間工廈內的100呎劏房，但個app能否成功，最重要係夠不夠多司機接order。「當時我哋要四圍派傳單做宣傳同搵司機，好彩做飯盒廣告嗰陣識落大班司機，司機數目增長得幾快，3個月之後已經唔使我哋再主動搵，啲司機會自己登記做我哋成員。」
現時 GOGOVan 已有超過25,000名登記司機，每日都接到幾萬單order。不過，至今 GOGOVan 仍未有向司機或顧客收取任何費用。「總有一日係會向司機收某個%嘅佣金，但仲未有時間表，WhatsApp用咗咁多年都係免費啦！」
隨着生意起飛，目前 GOGOVan 聘請了40多名員工，主要是為司機及顧客提供customer service；1個月前，辦公室亦搬進了觀塘5,000多呎的甲級工貿單位。
1個月前，有40多名員工的 GOGOVan，搬進觀塘甲級工貿大廈內的5,000多呎單位。
GOGOVan的宣傳易廣告雖有印上他們logo的貨Van出現，但其實只是租來的道具，並非真正為他們擁有。不過，若然 GOGOVan 登記司機想的話，也可將 GOGOVan logo張貼於車身上，無任歡迎。
融資．收購．衝出香港
沒有收入、只有支出（而且愈使愈大），創業之初那2萬元資本，不到兩個月便花光；隨後幸得數碼港創業基金兩次合共約40萬的資助，又支撐了幾個月。 GOGOVan 開業至今約1年5個月時間，主要營運與擴展資金，都是靠Steven找來的天使投資者「泵水」。「佢哋有啲住南灣、揸法拉利嘅，投資畀我筆錢都唔算係咩啫，所以唔心急要收司機錢，最緊要發大間公司先。」
今年8月，Steven更加融資到650萬美金，收購了「大象」及「浩鉦」兩間有超過10年歷史的本地貨車電召中心。有這個舉動，是因為看中這兩間「前輩」公司的經驗，「其實物流業有好多麻煩嘢，客人同司機成日都會拗數，點樣處理紏紛、點樣處理啲特別order，呢啲嘢唔係話學就學到，呢兩個台嘅經驗幫到我哋解決問題。」當然，兩個電召台的忠實客人，現在也變成 GOGOVan 的客人了。
其實那筆融資，主要是來自新加坡的投資者，給 GOGOVan 融資的目的，就係想他們進軍新加坡。「今年有唔同嘅國際投資者搵過我哋，話好多國家都需要呢種call貨van嘅app，但仲未有人做，問我哋有冇興趣合作去當地發展，最終傾成咗新加坡呢單，而家仲傾緊台灣。」現時 GOGOVan 已在新加坡開設了分部，由Steven的其中一位partner長駐坐鎮。
GOGOVan 急速擴展，Steven經常工作至深夜，更有時直頭睡在office。
「有WhatsApp個價就賣！」
縱使不斷有投資者加入，但Steven依然對經營 GOGOVan 很有興趣，從沒想過賣盤。「成間公司係我同幾個partner揼石仔揼返嚟，呢一刻冇諗過賣。」真係多多錢也不賣？最後他講笑答：「如果有人開WhatsApp個價，梗係賣啦！」（編按：WhatsApp於今年10月被facebook以220億美元收購。）
28歲，至少有資格開一個涉及220億美金的玩笑。28歲，我們在做甚麼？
關注我們：
GOGOVan Website: https://dev.gogovan.com.hk
GOGOEnergy Website: https://gogoenergy.hk/
GOGOVan Facebook: https://www.facebook.com/gogovanhk/
GOGOVan Instagram: https://www.instagram.com/gogovan_hk/?hl=en
GOGOVan Linkedin: https://www.linkedin.com/company/3787021/